В Атырау +25 
17 маусымда Болгарияның София қаласында өткен Еуропалық физика олимпиадасы (EuPhO-2025) мәресіне жетті. Биылғы жарысқа 39 елден 200-ден астам жас физик қатысты, деп хабарлайды ҚР Оқу-ағарту министрлігінің баспасөз қызметі.
Қазақстан құрамасы жарыста жоғары нәтижелер көрсетті: ел намысын қорғаған бес оқушының барлығы жүлделі орындарға ие болды.
Астана қаласындағы Республикалық физика-математика мектебінің 10-сынып оқушысы Ілияс Қазымбек абсолютті жеңімпаз атанып, алтын медальмен марапатталды.
Сонымен қатар, РФММ-нің тағы бір 10-сынып оқушысы Алтаир Аканов пен Алматыдағы «Miras» халықаралық мектебінің 11-сынып оқушысы Роман Черемнов күміс медаль иеленді. «Nurorda» халықаралық мектебінің 11-сынып оқушысы Даниэль Тюлюбаев қола медаль алды. Қостанай облысындағы «Білім-инновация» лицей-интернатының 10-сынып оқушысы Таир Әбдіқадыр құрмет грамотасымен марапатталды.
Команданы халықаралық және республикалық олимпиадалардың жеңімпаздары, тәлімгерлер Андрей Сидоренко мен Темірлан Исмагұлов дайындады.
EuPhO – мектеп оқушыларына арналған беделді халықаралық олимпиада. Өткен жылы Қазақстан командасы 2 күміс және 2 қола медаль жеңіп алған еді. Биылғы жетістік елімізде дарынды оқушыларды жүйелі қолдау мен оқытудың нәтижесі екенін дәлелдейді.