В Атырау +31 
Ұлыбритания премьер-министрі Кир Стармер бейсенбі күні Маврикий өкілдерімен Чагос архипелагын беру туралы келісімге қол қояды. Архипелагтың басты аралы Диего-Гарсиядағы британ-америкалық әскери база аумағын Ұлыбритания 99 жылға жалға алады, деп хабарлайды BBC News Русская служба.
Келісім "виртуалды рәсім" форматында жүзеге асырылады. Бұл туралы алғаш рет британдық Telegraph газеті хабарлады.
Бұған дейін Чагос архипелагын беру туралы келіссөздер АҚШ-тағы президент ауысуына байланысты тоқтап қалған деп есептелген. Трамп әкімшілігі архипелагты беру шарттарын зерттеу үшін уақыт қажет екенін мәлімдеген. Бұл аумақта стратегиялық маңызы бар әскери-әуе базасы орналасқан.
Чагос архипелагы ресми түрде Үнді мұхитындағы Британ территориясы деп аталады. Ол мұхиттың ортасында орналасқан, ал Диего-Гарсия базасынан ұшатын АҚШ пен Ұлыбритания әскери ұшақтары Таяу Шығыстағы операцияларға қатысады.
Чагос архипелагын Маврикийге беру туралы келіссөздер 2019 жылы басталды. Бұл Ұлыбританияның архипелагтың мәртебесі жөніндегі дауда БҰҰ-ның Халықаралық сотында ұтылғанынан кейін орын алды.
Алайда, Чагосты беру туралы нақты жоспарды Ұлыбританияның жаңа лейбористік үкіметі тек өткен жылдың қазан айында жариялады.
Келісімге сәйкес, Ұлыбритания Маврикийге Чагос архипелагын беру туралы шешім қабылдағанымен, Диего-Гарсия базасын 99 жылға жалға алады.
Бұл шешімге қарсы пікір білдірушілер Маврикийдің Қытай, Иран және Ресеймен жақындасуы Ұлыбритания мен АҚШ-тың ұлттық қауіпсіздігіне қауіп төндіруі мүмкін деп санайды.